عارف
عارف ؟؟
ـــــــــــــــــــــــــــــــــــــــــــــــــــــــــــــــــ
عارف
لما يجيلك يوم إحساس
إن الدنيا مفهاش ناس
وان فى حاجه مش مظبوطه
ولا حاجات
وإن الجاى ف بكره أكيد
توأم نسخة وطبق الأصل
من أيام كنت فاكرها
إن زمانها
عدى وفات
عارف
لما الدنيا بتفضى عليك
والناس تبعد من حواليك
محمد رشاد العربى
شوف قدامك
مد إيديك
تلمس خطوة ف أى طريق
ويمكن تلقى مره صديق
ولا ما تلقاش
فارقه كتير
ولا ما فارقاش؟؟
عارف
لما ف لحظة
وفجأه تفوق
إنك عمرك
ما طرت لفوق
وان سنين طيرانك كانت
بس لتحت
وتحت الفحت
وفجأه اصحابك
ردموا عليك
عارف
مهما تفكر إنك عارف
مهما ها تحلم إنك شايف
مهما خيالك يبقى مريض
ويصورلك يوم العيد
على إنه
كل الأيام
ها تيجى اللحظة
وفجأة تفوق
تنزل على جدر رقبتك
من علو وفوق
طبعاً فووووووووووووووق
عارف ليه
لأنك لسه يا صاحبى البيه
ما انتاش عارف
ووقت ما تعرف
إنك لسه يا سيدنا البيه
محتاج تعرف
وإللى ها تعرفه
بدرى عليه
بس ساعتها تبدأ تعرف
إنك عارف
إنك لسه برضه أكيد
ما انتاش عارف
محمد رشاد العربى
الإثنين 9/4/2012
04:52 صباحاً
